جه‌ماوه‌ری تێکۆشه‌ری کوردستان!
٧٨ ساڵ له‌مه‌وبه‌ر، له ناوه‌ندی مه‌یدانی چوارچرای شاری خۆڕاگر و کوردپه‌روه‌ری مه‌هاباد، لهسهر ده‌ستی پێشه‌وای نه‌مر قازی محمد و به‌پشتیوانی مه‌لا مسته‌فای بارزانی وچه‌ندین که‌سایه‌تی سیاسی و ئایینی نیشتمانپهروهری کوردستان، له ٢ی ڕێبه‌ندانی ١٣٢٤ی هه‌تاوی، به‌رامبه‌ر به ٢٢ی ژانوییه‌ی ١٩٤٦ی زایینی، له ئه‌نجامی هه‌وڵ و تێکۆشانی به‌رده‌وامی تێکڕای تێکۆشه‌ران و نیشتمانپه‌روه‌رانی کۆمه‌ڵه‌ی "ژێ كاف" و که‌ڵک وه‌رگرتن له‌و ده‌رفه‌ته مێژوویه، له‌ناو ئاپۆرای خه‌ڵکدا به‌فه‌رمی کۆماری کوردستان ڕاگه‌یاندرا و کورد بە سەربەستی و بەختەوەری شاد بوەوەو بە ئاوات گەیشت.
کارنامه‌ی کۆماری کوردستان و خه‌بات و ئامانجه‌کانی ئهو کۆماره، له‌و ماوه کورته‌ی ته‌مه‌نی خۆیدا ئەزمونێکی دەوڵەمەندی بۆ هاونیشتمانیانی کوردستان بەجێهێشت و بووه ده‌سکه‌وتێکی مێژوویی وجێگەی دڵخۆشی و سەرفرازی گەلی کوردستان. هه‌ر بۆیه تێکۆشه‌رانی ڕێگه‌ی ئازادی له کوردستان دا، لەسەر هەمان ڕێگە و بە هەمان ئامانجی پیرۆز هه‌نگاو ده‌نێن و کوماری کوردستان وه‌ک به‌هاو کۆڵه‌که‌یه‌کی به‌رز و پته‌وی هزری نه‌ته‌وه‌یی و نیشتمانپهروهری ده‌بینن و یادی بۆ هه‌میشه به‌رز ڕاده‌گرن.
بە داخەوە بە هۆی بێ ئەزموونی کورد بۆ دەسەڵاتداری و خۆبەڕێوەبەری و هەل و مەرجی سیاسی جیهانی و قۆناغی تایبەتی و بێ بەڵێنی بەناو دۆست و پشتیوانانی گەل و کۆمارەکەمان، ئەم کۆمارە لە تەمەنی ١١ مانگی دا جوانەمەرگ کرا بەڵام سەرەڕای تەمەنی کەمیی، تائێستا کاریگەری و شوێنەوارە ئەرێنیەکانی لە بوارەکانی، سیاسی، کۆمەڵایەتی، رووناکبیری، دادپەروەی کۆمەلایەتی، بەرانبەریی و یەکسانی، لە هەست و بیری کورد دا کاڵ نەبوونەوە و گەلەکەمان بۆ وەدیهاتی ئاوت و ئامانجەکانی کۆمارە خۆشەویست و تاقانەکەمان لە خەبات و تیکۆشان رانەوەستاوە و تا گەیشتن بە ترۆپکی ئازادی و رزگاری و بەختەوەری ئەو رێگەیە دەبڕێ.
سازمانی خه‌باتی کوردستانی ئێران، یادی ٢ی ڕێبه‌ندان ساڵڕۆژی دامه‌زرانی کۆماری کوردستان، كە یادگاری ئه‌ندامی وه‌فاداری كۆمەڵەی ژێكاف و پشتیوانی كۆماری كوردستان، واتە ڕێبه‌ری نه‌ته‌وه‌یی گه‌له‌که‌مان مامۆستا شێخ جەلالی حوسەینی، به‌رز و به‌ڕێز ڕاده‌گرێ و بۆ هه‌میشه پشتیوانی له ده‌سکه‌وت و ئامانجه‌کانی کۆماری کوردستان ده‌کا.
له‌یادی کۆماری کوردستان دا، پێویسته په‌یمانی هاوخه‌‌باتی و ته‌بایی و یه‌کڕیزی له‌نێوانمان دا نوێ که‌ینه‌وه و له پێناو درێژه‌پێدانی ئامانج و خه‌باتی کۆماری کوردستان و ماف و ئازادیه ڕه‌واکانی گه‌لی چه‌وساوه‌ی کوردستان دا بە خۆڕاگری و یەکریزی، درێژە بە رێبازی پڕ لە سەروەری و شانازی شەهیدانی کورد و کوردستان بده‌ین و بۆ گەیشتن بە ئامانجەکان و بۆ پارێزگاری له نیشتمان و ئازادی ووڵاتمان، هه‌وڵ و خه‌باتمان بۆ ڕوخانی یه‌کجاری و نه‌مانی رژیمی نه‌گریسی ئاخوندی و ڕژیمە دیکتاتۆر و گه‌نده‌ڵه‌که‌ی گشتگیرتر بکه‌ین. پێویسته هه‌‌‌موو لایه‌‌‌ک ئهو ڕاستیه بزانن که ته‌‌‌نها به ڕوخان و له‌‌‌ناوچوونی ئهم ڕژیمه خهڵکی ئێران و کوردستان ده‌‌‌توانن به ئامانجه‌‌‌کانیان بگه‌‌‌ن. خهڵکی ئێران و کوردستان به‌درێژایی ته‌مه‌نی ئهم ڕژیمه دیكتاتۆرە بونه قوربانی کار و پلانه دژمنکاریه‌کانی ئهم ده‌سه‌ڵاته دیکتاتۆر و خوێنمژه و له دۆخێکی خراپی ئابووری و چه‌‌‌وسانه‌‌‌وه و ژێرده‌‌‌ستی دا ده‌‌‌ژین و به‌به‌رده‌وامی تووشی نه‌‌‌هامه‌‌‌تی و زیندان و سێداره ده‌‌‌بنه‌‌‌وه، به‌ڵام وره و باوه‌ڕیان به ئازادی و ڕزگاری له‌ده‌ست نه‌داوه و نارەزایەتیه سه‌رتاسه‌ریه‌کانی ئەم چه‌‌‌ند ساڵەی ڕابردوو، له‌‌‌لایه‌‌‌ن خهڵکی وه‌‌‌زاڵه‌‌‌هاتووی ئێران و کوردستان دەرخەری ئەم راستییەن کە ئهم ڕژیمه لهسهر لێواری ڕوخان نزیکه و بەرەنگار بوونەوە لە بەرانبەر ڕژیم و ده‌‌‌سه‌‌‌ڵاتی ناعه‌‌‌داڵه‌‌‌ت، ڕوو لە هەڵکشانە و دۆستایه‌‌‌تی و به‌‌‌ڕە‌سمی ناسینی ئهم ڕژیمه بۆته جێگەی شه‌‌‌رمه‌‌‌زاری.
لەم هەلومەرجە چارەنووس سازەدا، پێویستە خەباتی یەکانگیر بە مەبەستی کۆتایی هاتنی دەسەڵاتی ئاخوندەکان پەیڕەو بکه‌ین و سه‌نگه‌ری خه‌باتمان قایمترکه‌ین.
پیرۆزبێ بیرەوەری ٢ی ریبەندان، ساڵرۆژی دامەزراندنی کۆماری کوردستان
سازمانی خەباتی کوردستانی ئێران
کومیتەی ناوەندی
۱ ی ڕێبەندانی ۱۴۰۲ی كۆچی خۆری
