بەپێی ڕاپۆرتی هەواڵدەریەکان، لوقمان قادری، زیندانیی سیاسیی کورد، لەژێر فشاری ناوەندە ئەمنییەتییەکانی ڕژیمدایە، ناوبراو چەندین جار لەلایەن ئیتلاعاتی ورمێەوە هەڕەشەی کوژران و بێسەروشوێنکرانی لێ کراوە و چەندین جاریش بەرەوڕووی تیربارانی ساختە بووەتەوە.
ئەمە نیگەرانیی خانەوادەکەی بەدواوە بووە و سەرەڕای هەوڵێکی زۆر بۆ دانانی بارمتە و ئازادکردنی، لەلایەن دادسەرا و دادستانی رژیم لە پیرانشارەوە وڵامیان نەدراوەتەوە.
سەرچاوەیەکی ئاگادار بە هەواڵدەرییەک ڕایگەیاندووە، لوقمان قادری، کە پاش ٨ مانگ و نیو شکەنجە و لێپرسینەوە لە گرتووخانەی ئیدارەی ئیتلاعاتی ورمێەوە بۆ زیندانی نەغەدە ڕاگوێزاوە، لە ماوەی چەند حەفتەی ڕابردوودا بۆ شوێنگەلێکی نادیار ڕاگوێزراوە، بەتوندی لێی دراوە و هەڕەشەی کوژران و بێسەروشوێنکرانی لێ کراوە و چەندین جاریش بە شێوەی ساختە، تیرباران کراوە.
ناوبراو بە تۆمەتی "ئەندامەتی لە یەکێک لە حیزبە کوردییەکانی دژبەری ڕژیمی ئێران"، حوکمی دوو ساڵ و ٧ مانگ زیندان و ١٦ ڕۆژ زیندانی بەسەردا سەپاوە.
