پەرهام پەروەری، یەکێک لە بەندکراوانی بزووتنەوەی شۆڕشگێڕیی ژن، ژیان، ئازادی، بەبێ ئاگاداریی خانەوادەکەی و بە نهێنی لە زیندانی ئێڤینەوە بۆ زیندانی ئێرانشار ڕاگواێزراوە.
ئەم هاووڵاتییە کوردە کە ساڵێك و چوار مانگی لە بەندکرانی ناڕەوای بەسەر بردووە، پێشتر لە لایەن لقی ٢٨ی بێدادگای بەناو ئینقلابی ڕژیم لە تاران, ١٠ ساڵ دوورخستنەوە بۆ زیندانی جاسک لە پارێزگای هورمزگان و پێنج ساڵ زیندانی تەعزیری بەسەردا سەپێندرا بوو.
پەرهام پەروەری لە ١١ی ڕەزبەری ساڵی ڕابردوو لە لایەن بەکرێگیراوانی سەرکوتکەری ڕژیم گیراو لەلایەن بێدادگای ئەمنیەتی ڕژیم لە زیندانی ئێڤین بە "موحارەبە" تۆمەتبار کرابوو.
ئەم لاوە کوردە ناڕازییە تەمەن ٢٦ ساڵە، پاڵەوانی مەلەوانییە و دەرچووی ئەندازیاریی میکانیکی زانکۆی سەنعەتیی ورمێیە.
