بەرزین هەمزەزادە، سەرەتای مانگی سەرماوەزی ساڵی ١٤٠١ی هەتاوی و لە ڕەوتی بزووتنەوەی ژن، ژیان، ئازادی، کە تەمەنی تەنیا پانزە ساڵ بوو، لەلایەن هێزە سەرکوتکەر و بەناو ئەمنییەکانی ڕژیمی ئاخوندی ئێرانەوە گیراو و بۆ ماوەی حەوتوویەک شکەنجە درا.
کاریگەرییە جەستەییەکانی ئەم شکەنجەیە ئەوەندە سەخت بوو کە هەموو ژیانی تێکدا. چەندین جار هەوڵی چارەسەرکردنی گورچیلەکانی دەدا کە بەهۆی لێدانی بەكرێگیراوانی حکوومەتەوە لەکارکەوتبوون؛ چووە لای پزیشک، بەڵام دواجار ڕۆژی سێشەممە ١٢ی بەفرانباری ئەمساڵ لە نەخۆشخانەی خومەینی شاری ورمێ لە کاتی نەشتەرگەریدا گیانی دا.
بەفرین مەحمودی, دایکی ئەم شەهیدە گەنجەی کوردستان، لە ڕۆژی بەخاكسپاردنی کوڕەکەیدا، لەگەڵ گریان و شیوەن بە هەڵگرتنی دەسماڵێكی سوور کە هێمای "شەهیدبوون"ە لە کولتووری کوردیدا, تەرمی کورە شەهیدەکەی بۆ ئەسپەردەی خاکی نیشتمان کرد.
