ئەمڕۆ یەکشەممە، ١٠ی بەفرانباری ۱۴۰۲ی هەتاوی، پێشەوا هەورامی، وتەبێژی حکومەتی هەریمی کوردستان لە ڕاگەیەندراوێكدا ئاماژەی بەوە کرد، "شەوی ڕابردوو سەعات ۱۱:۴۵ خولەک؛ بە دوو درۆنی بۆمبڕێژکراو هێرشکرایە سەر بارەگایەکی هێزی پێشمەرگەی کوردستان لە سنووری پیرمام-هەولێر کە بەخۆشیەوە زیانی گیانی نەبووە و تەنیا زیانی ماددی لێ کەوتەوە".
وتەبێژی حکومەت ئاماژەی بەوە کرد، "ئەم هێرشە ترۆریستییە لە لایەن هێزێکی لە یاسادەرچوو بە چاوساخی و هاوکاریی جاش و هاوکارەکانیان بۆ سەر بنکەیەکی هێزی پێشمەرگە مەترسیدار و شەڕ فرۆشتنە".
پێشەوا هەورامی دەڵێت: ئێمە ئەو لایەنانە و حکومەتی فیدراڵ بە بەرپرس دەزانین بەرانبەر بەم هێرشە ترسنۆکانە، چونکە ئەم گروپە لە یاسادەرچووانە لە لایەن حکومەتی فیدراڵی بودجە و مووچەیان پێ دەدرێت و چەکدار دەکرێن و بە بەر چاوی حکوومەتی عێراقەوە هاتووچۆ دەکەن و چەک و مووشەك و درۆن دەگوازنەوە و هێرشی ترۆریستی دەکەنە سەر دامودەزگا فەرمی و سەربازییەکان.
