تێکۆشان
TEKOSHAN
NET
بەپێی هەواڵەكان رژیمی ئاخوندی لە شارەكانی كوردستاندا رێوشوێنی سەركوتگەرانەی دیكەی گرتووەتەبەر.
لە دوای ئەوەی راپەرینەكان هەموو شارەكانی كوردستانی گرتەوە و لە چەندین شاری وەكوو، سەقز، بۆكان، دیواندەرە، بانە، شنۆ، سنە، كرماشان، مەریوان و سەردەشت خەڵكی ناڕازی لە زوڵمی و ستەمی ئاخوندان و بۆ تۆڵەی خوێنی ژینا ئەمینی پەلاماری بنكە و مۆڵگەی هێزە سەركوتگەرەكانیاندا و توانیان تەنگ بەو هێزانە هەڵچنن و لە شارەكان وەدەریان نێن، رژیم ئەو شارانەی بە تەواوی میلیتاریزە كردووە. بەپێی هەواڵ رژیم ئاڵووگۆڕی بە هێزەكانی خۆی لە شنۆ كردووە و جاش و پاسداری لە شارەكانی دەورووبەرەوە بۆ ئەو شارە بردووە زۆربەی كۆڵان و سەر شەقامەكانی پڕ كردووە لە جاش و پاسدار. ئەو هێزانەی رژیم لە شنۆ لە هیچ كەس دەست ناپارێزن و دەگوترێ بەبێ هیچ بیانوویەك دەچنە سەر ماڵی خەڵك و لاوان دەگرن و هەڵسوكەوتی توند و بێ رێزانەیان لەگەڵ دەكەن.
بەپێی دوایین زانیاریەكان شارەكانی بانە، سەردەشت، سەقز و دیواندەرە بە تەواوی میلیتاریزە كراوە و لەو شارانەدا هێزێكی زۆری رژیم مۆڵدراوە. زیانیاریەكان باس لەوە دەكەن زۆربەی مەیدان و شەقامە سەرەكیەكانی ئەو شارانە بە هێزی زۆر و بۆری دەسەڵاتی ئاخوندان تەوق دراوە.
لە شارەكانی سنە، كرماشان، بۆكان، مەریوان وێڕای مۆڵدانی هێزێكی زۆری دەسەڵات، بەڵام راپەرین بە شێوەی جیاجیا راپەرینەكان درێژەیان هەیە. بەپێی زانیاریەكان لاوان و ئافرەتانی كرماشان و سنە لەگەڵ تاریك و روونی ئێوارە دێنە سەر شەقامەكان و هەتا نیوە شەو شەقامە سەرەكیان و دەوری مەیدانەكانی ئەو شارانە دەبێتە شوێنی راپەریوان. جەماوەری راپەریوی ئەو شارانە بە دانی دروشم و شیعارەكانی وەك مەرگ بۆ خامنەیی، ژن ژیان ئازاد، جەهموری ئیلامیمان ناوی، "توپ تانك فشفشە آخوند باید گم بشە" ترسیان خستۆتە دڵی هێزەكانی رژیم.
بەپێی راپۆرتەكان لەم راپەرینانەدا هەتا ئێستا لەشارەکانی کوردستان نزیك بە 20 كەس شەهید و نزیك بە 170 كەسیش بە تەقەی هێزەكانی رژیم بریندار كراون.
