زیلینسکی داوای راگرتنی پەیوەندییە بازرگانییەکانی رووسیا و ئەوروپا دەکات

داواکەی زیلینسکی لەکاتێکدایە، چەند وڵاتێکی یەکێتیی ئەوروپا داوای قەدەخەی هاوردەی نەوت و گازی رووسیا دەکەن. ئەڵمانیا دژی ئەم هەنگاوەیە، ئەوەش بەهۆی پشتبەستنی زۆری ئەو وڵاتە بە گازی رووسیا. رۆژی دووشەممە وەزیرانی دەرەوەی یەکێتیی ئەوروپا لەسەر پرسی وزەی رووسیا لە بروکسل کۆبوونەوە، بەڵام نەگەیشتنە هیچ ئەنجامێک. لە ساڵی 2021ـدا، رووسیا پێنجەم گەورەترین هاوبەشی بازرگانیی یەکێتیی ئەوروپا بووە و قەبارەی بازرگانیی نێوانیان زیاتر لە 287 ملیار دۆلار بوو، 5.8%ـی کۆی بازرگانیی یەکێتیی ئەوروپا. رۆژی دووشەممە ئەلیکساندەر نۆڤاک، جێگری سەرۆکوەزیرانی رووسیا هۆشداری دا لەوەی ئەگەر جیهان بەتەواوی بایکۆتی نەوتی رووسیا بکات، نرخی بەرمیلێک نەوت بۆ 300 تا 500 دۆلار بەرزدەبێتەوە.