بەپێی ڕاپۆرتی سەرچاوە هەواڵدەریەکان، وریشە مورادی، ناسراو بە جوانا سنە, چالاکی سیاسی، خەڵکی شاری سنە، لەلایەن هێزە ترۆریستیەکانی ئیتلاعاتی ئەو شارە، بەمەبەستی وەرگرتنی دانپێدانانی زۆری دژ بە خۆی, شکەنجە دراوە و لەماوەی ڕابردوودا بۆ یەکێک لە گرتووخانەکانی تاران گواستراوەتەوە.
بەوتەی سەرچاوەیەکی ئاگادار، وریشە مورادی لە ماوەی گرتنی دا هەتا ئاستێک بە سەختی شکەنجە دراوە کە لە یەک حاڵەتیاندا خوێنی هەڵهێناوەتەوە و بە تەواوی لە هۆش چووە.
هەرەوەها دۆخی نەخۆشیی میگرێنی وریشە مورادی، لەماوەی دوو مانگ و هەشت ڕۆژی پێشوودا و دوای بێبەشکردنی لە مافی دەستپێڕاگەیشتن بە دەرمانەکانی ڕووی لە خراپتربوون کردووە.
وریشە مورادی ڕۆژی سێشەممە ١٠ی گەلاوێژی ١٤٠٢، لە ڕێگای مەریوان_سنە لەلایەن هێزەکانی ئیتلاعات ڕفێندرابوو و لە کاتی ڕفاندنی بەسەختی لێی دراوە و بەبێ چارەسەرکردنی پزیشکی بۆ گرتووخانه ڕاگوێزراوە.
