تێکۆشان
TEKOSHAN
NET
ڕۆژێ سێ شەممە 3ی ڕەشەممە، لە سەر داوای شۆرای هاوئاهەنگی فەرهەنگیەکانی ئێران، مامۆستایان و فەرهەنگیە خانەنشینەکان لە شارەکانی ئێران و کوردستان، بە شێوەی سەرانسەری لە بەرانبەر ئیدارەی فێرکاری و پەوەردەیی شارە جیاجیاكان و هەروەها لە تاران لە بەرانبەر شۆرای ڕژیم، بە هۆی پێشێلكردنی مافەكانیان ناڕەزایەتیان دەربڕی.
لەو خۆپیشاندانانەدا دوو کەس بە ناوەکانی سوڵماز فەیزوڵا زادە، ئەندامی هەیئەتی بەڕێوەبەری ناوەندی سنفی مامۆستایانی پارێزگای ئەلبورز و حەسەن بەهامین، مامۆستا و چالاکی سنفی دانیشتوی یاسوج، لە لایەن هێزە سەرکوتگەرەکانەوە دەستبەسەر کراون و تا ئێستاش چارەنوسی بەهامین نادیارە. مامۆستایان و فەرهەنگیەکان بە وتنەوەی دروشم دژی ڕژیمی ئاخوندی، ناڕەزایەتی خۆیان بەرانبەر بە دەسەڵاتداران و گەندەڵی ئاخوندان، پێشێلکردنی مافەکانیان، چەواشەکاریەکانی ڕژیم، بەردەوامیان بەو خۆپیشانانەدا ئەدا. داواکاری مامۆستایان لەو خۆپیشاندانانەدا بریتی بوون لە بەڕێوەچوونی تەواوی یاسای پلەبەندی فەرهەنگیەکان لەسەر کار و هەروەها یەکسان کردنی موچەی خانە نشیان، بە فەرمی کردنی ئەو مامۆستایانەی بە كاتی دامەزراون، ئەو كەسانەی خزمەتگوزاری فێرکاری، وانەبێژانی کەم خوێندەواری(نهضت)و مامۆستایانی پێش سەرەتایی، پێدانی پاداشتی کۆتایی خزمەتی فەرهەنگیەکانی ساڵی 1400، چاکسازی موچەی هێزەکانی خزمەتگوزاری، بەڕێوەبردنی ئەسڵی 30ی یاسای ئەساسی، ئازادکردنی مامۆستایانی بەندکراو، فێرکاری خۆڕایی و کوالێتی بەرز بۆ قوتابیەکان، پێدانی بیمەی قوتابیەکان و هەروەها بەڕێوەچونی وانە دەرسیەکان بۆ کەمتر لە 16 قوتابی.
