فشارەکان لە سەر زەینەب جەلالیان بە ڕێگریکردن لە چارەسەری پزیشكی لەلایەن بەرپرسانی زیندانی ناوەندیی یەزدەوە زیادی کردووە. بە پێی راپۆرتی هەوالدەرییەکان، زەینەب جەلالیان، زیندانیی سیاسیی کوردبە هۆی ئازارێکی زۆری جەستەیی بۆ نەخۆشخانەی زیندان گوازرایەوە و بەبێ سەردانی كردنی پزیشکی پسپۆڕ گەڕێنرایەوە بۆ زیندان.
بەپێی ڕاپۆرتی ناوەندی مافی مرۆڤی ئێران، ناوبراو ماوەیەکی زۆرە بە ئازاری لای ڕاستی جەستەی دەناڵێنێت، بەڵام بەرپرسانی گەندەڵی زیندان هیچ ڕێوشوێنێكیان بۆ چارەسەرکردنی و گواستنەوەی بۆ نەخۆشخانەیەکی دەرەوەی زیندان و سەردانکردن پزیشکێکی پسپۆڕ نەگرتووەتەبەر و بەم کارە هەوڵی شکەنجەدانی دەدەن. جێگەی باسە کە، لە مانگی جۆزەرداندا تیمێکی لێکۆڵینەوە و بەرپرسانی ئیتلاعات بە نۆرە لە نووسینگەی بەندیخانەی ناوەندیی یەزد لەگەڵی کۆبوونەوە و داوایان لێکرد بەمەبەستی چارەسەرکردنی کێشە پزیشکییەکانی نامەی تەوبە بنووسێت. ناوبراو وێڕای ڕەتکردنەوەی ئەم داواکارییە، چارەسەر و دەرمان بۆ ڕێکارە پزیشکییەکان بە مافی ڕەوای خۆی زانیوە.
