سێ چالاکی کرێکاری بە ناوەکانی مورتەزا سەیدی، محەممەد ئێراننژاد و نەسروڵڵا ئەمیرلوو، لەلایەن بێدادگای رژیمی ئێرانەوە سەرجەم سزای شەش ساڵ بەندکرانیان بەسەردا سەپێندرا.
بەپێی ڕاپۆرتی هەواڵدەرییەکان، لەم دواییانەدا مورتەزا سەیدی، چالاکی کرێکاریی کورد و خەڵکی کامێران، محەممەد ئێراننژاد و نەسروڵڵا ئەمیرلوو، لەلایەن لقی دووی دادگای سەرکوتگەری بە ناو شۆڕشی شەهریار بە سەرۆکایەتیی بە دادوەر بەهرام پەناهی بە تۆمەتی "پێکهێنانی دەستە و گرووپ بەمەبەستی تێکدانی ئاسایش" هەر یەک سزای دوو ساڵ بەندکران و سەرجەم سزای ٦ ساڵ بەندکرانیان بەسەردا سەپێندرا.
مورتەزا سەیدی و نەسروڵڵا ئەمیرلوو، ڕۆژی هەینی ٢٦ی خاکەلێوە لەگەڵ چەند چالاکی کرێکاریی دیکە لەلایەن هێزە ئەمنییەکانی شەهریاری سەر بە پارێزگای تارانەوە بەند کران.
ئەو دوو چالاکە کرێکارییە، بانەمەڕ ی ۱٤۰۲ بەدانانی بارمتە و بەشێوەی کاتی هەتا کۆتایی هاتنی پرۆسەی دادگاییکردنەکەیان لە بەندیخانەی ئێڤین ئازاد کران.
هەروەها محەممەد ئێراننژاد لە پەیوەندی لەگەڵ دۆسیەی پێشووی خۆیدا ٥ی پووشپەڕی ۱٤۰۲، بەمەبەستی تێپەڕکردنی سزای بەندکرانەکەی بەڕێی بەندیخانە کرابوو. ناوبراو لە ئاکامدا ڕۆژی ١ی ڕەشەممەی ۱٤۰۲ لە بەندیخانەی ڕەجایی شاری کەرەج ئازاد کرا.
