سەرۆک وەزیرانی ئیسرائیل ڕایگەیاند، لەنێوبردنی تەواوەتیی حەماس ئامانجێکە کە ئەنجومەنی جەنگی ئیسرائیل بەکۆی دەنگ پەسەندی کردووە و سوورن لەسەر بەدیهێنانی.
نێتانیاهو لەسەر ئەم بابەتە وتی لەلایەن هاوپەیمانەکانییەوە فشاری لەسەر دروست نەکراوە بۆ ڕەتکردنەوەی دەستپێشخەرییەکەی سەرۆکی ئەمەریکا بۆ ئاگربەست لە غەززە.
ناوبراو هەروەها وتی: بە سەدان شێوە بیر لەگەڕانەوەی بارمتەکان بۆلای کەسوکارییان دەکەمەوە، هەمووکات ئەم بابەتە لە مێشکمدایە. بیر لە خێزانەکانیان دەکەمەوە، بیر لەو ئازارە دەکەمەوە پیایدا تێپەڕیوون، بەڵام ئێمە ئامانجێکی دیکەشمان هەیە ئەویش ڕیشەکێشکردنی حەماسە کە لە لایەن ڕژیمی ئێران پشتیوانی لێ دەکرێت.
ئەوە ئامانجێک نییە من ئێستا زیادم کردبێت، بەڵکوو ئێمە سوورین لەسەر گەڕاندنەوەی بارمتەکان و لەنێوبردنی تەواوەتیی حەماس، ئەم دوو ئامانجە تەواوی ئەندامانی ئەنجومەنی جەنگی ئیسرائیل دەنگیان لەسەری داوە.
