نازدار ڕودساز، دایکی کەیوان ڕەشوزادە، زیندانیی سیاسیی کوردی خەڵکی ورمێ، کە پێنجەمین ساڵی لە زینداندا لەم شارە بەسەر بردووە و لەم دواییانەدا بە توندی ئەشکەنجە دراوە، لە پەیامێکی ڤیدیۆییدا دەڵێت؛
من دایکی کەیوان ڕەشوزادەم، کوڕەکەم ٧ ساڵ و ٦ مانگ زیندانی ناڕەوا بەسەریدا سەپاوە، ٥ ساڵ لەو سزایەی تێپەڕاندووە، بەڵام کەس گرنگی بە دۆخی نادات، دەچمە لای بەناو دادوەری نازر، بەڵام هیچ گرنگی پێی نادات، دەچمە ئیدارەی ئیتلاعات دەڵێن ئێمە هیچ زانیارییەکمان نییە و دەستوەردان لەم بابەتەدا ناکەین، سەرۆکی زیندان و دادوەری نازر ئاگاداری دۆخی ئەو هەن.
هەروەها دەڵێت بەرپرسانی زیندان لە کوڕەکەیان داوە، پاسەوانانی زیندان هاتوون، دەست و قاچیان بەستووە و لێیان داوە، مل و سەر و دەستیان شکاندووە. لەو كاتەوە ئاو و خواردنی نەخواردووە، باوکی کەیوان نەخۆشە، دایکی ئەم منداڵەش نەخۆشە، بێ سەرپەرشت ماوینەوە، ئێمە بێتاوانین، کەس بە دەردی ئێمە نازانێت و نازانین چی بكەین.
