ڕۆژی سێشەممە، ١٥ی ڕەشەمە، سامان یاسین (سەیدی)، هونەرمەندی کوردی خەڵکی شاری کرماشان و لە بەندکراوانی شۆڕشی ژینا، لە بەندیخانەی قزلحساری کەرەجەوە بۆ نەخۆشخانەی دەروونیی ئەمین ئاباد (ڕازی)ی شاری ڕەی تاران ڕاگوێزرا.
سوبحان یاسین، برای ئەم هونەرمەندە کوردە لەمبارەوە لە لاپەڕەی ئیکسی خۆیدا ڕایگەیاندووە: سامان یاسین لەژێر چاوەدێڕیی توندی ئەمنیەتی و بە دەستبەند و پێبەندەوە ڕەوانەی نەخۆشخانەی دەروونیی ئەمین ئاباد کراوە.
ناوبراو حەوتووی ڕابردوو ڕوو لە بەرپرسی قەزایی ڕژیم سەبارەت بە ناڕووونیی چارەنووسی ناڕەزایەتیی دەربڕی و نووسیبووی: من سامان یاسین، ١٨ مانگە کە لە بەندیخانەکانی تاران و کەرەج هاتوچۆم پێ دەکرێ و چارەنووسم ناڕوونە و بە بێ هیچ بەڵگەیەک لە بەندیخانە ڕاگیراوم. لەم ١٨ مانگەدا چەندین جار کاتی دادگاییم بۆ دیاری کراوە بەڵام بەڕێوە نەچووە. کێشەی دەروونی و جەستەییم هەیە و بەرپرسانیش بە مەبەستی وەرگرتنی چارەسەر ڕەوانەی ناوەندە دەرمانییەکانم ناکەن.
