نەستەرەن قاسمی، هونەرمەند و گۆرانیبێژی گیلەک لە شاری کۆچسەفەهان سەر بە پارێزگای گیلان، بڵاوکردنەوە و درێژەدان بە چالاکییە هونەریەکانی لێ قەدەغە کرا. پەیجی ئینستاگرامی نەستەرەن قاسمی سڕاوەتەوە و پۆلیسی سایبری ڕژیم لەکاتی سڕینەوەی پۆستەکانی پێشوویدا، پۆستێکی نوێی لە ئینستاگرامەکەی بڵاوکردەوە و تیایدا بانگەشەی ئەوە دەکات کە ئەم پەیجە بەهۆی بەرهەمهێنانی ناوەڕۆکی تاوانکاری بلۆک کراوە و بەڕێوبەرانی ئەم پەیجە سزا دراون. تۆمارکردنی دۆسیە لەسەر ئەم هونەرمەندە گیلەکە بە تۆمەتێکی نادیار، لەکاتێکدایە کە لە بواری موسیقادا چالاک بووە و لە پەیجی تایبەتی خۆی لە ئینستاگرام گۆرانی گیلەکی بڵاودەکاتەوە. ڕژیمی ئاخوندی ڕێگری لە هەر جۆرە چالاکیەکی ئافرەتان دەکات و بە بیانووی ناڕاست و تۆمەتگەلێکی ساختە و ناڕاست دۆسیە لە دژی ئەم ئافرەتە چالاکانە لە بوارە جۆراوجۆرەکاندا دەکاتەوە.
